O 26 de outubro celebraremos a XV Xuntanza de Veciñas e Veciños

O vindeiro domingo 26 de outubro de 2025, volveremos reunirnos na XV Xuntanza de Veciñas e Veciños da Pobra do Brollón. Con esta xuntanza propoñemos pasar un día de lecer e convivencia en compañía dos nosos veciños e veciñas guímaros. Será unha xornada completa na que celebraremos un xantar popular, amenizado con música e sorteos de agasallos.

A xuntanza está aberta a todo o mundo de calquera idade que queira participar. As persoas maiores de 60 anos e os seus respectivos cónxuxes ou parellas (aínda que non superen dita idade) terán un prezo reducido de 15€. Para gozar deste prezo subvencionado, deben estar empadroados no Concello. Para o resto de persoas que desexen acudir, estean ou non empadroados, o prezo será de 25€. Os nenos e nenas de ata 14 anos que estean empadroados no Concello terán tamén un prezo reducido de 10€. Para os menores de ata 14 anos que non estean empadroados, o prezo será de 15€.

A inscrición deberá realizarse de xeito presencial na Biblioteca Municipal (na Casa da Cultura 'Olga Novo', 2º andar) de luns a venres en horario de 10:30 a 13:30 horas. O prazo para apuntarse remata o día 20 de outubro de 2025. Para ter o menú subvencionado, é preciso presentar a carta que recibirán no seu domicilio as veciñas e veciños do concello. 

Para máis información poden contactar coa Biblioteca no teléfono 982 430 546.

Para facilitar a asistencia á Xuntanza, haberá servizo de transporte gratuíto, as persoas que o precisen, deben solicitalo na Biblioteca no momento da inscrición.

O menú inclúe: Empanada, Polbo, Carne ó caldeiro, Postre, Bebidas e café.