El sábado 27 de septiembre se celebra la XI edición de As Cores do Outono

O sábado 27 de setembro, celebramos na Pobra do Brollón a undécima edición do festival As Cores do Outono, organizado polo Concello co apoio económico da Área de Cultura da Vicepresidencia da Deputación de Lugo.

Este ano o evento levará á área recreativa de Samugueiros tres propostas musicais moi potentes que mesturan tradición e innovación: Carmela, Lideira e Xabier Díaz & Adufeiras do Salitre.

As propostas dos tríos Carmela e Lideira son máis pequenas en compoñentes pero non menos intensas.

Carmela é un proxecto musical que basea o seu repertorio na tradición oral galega, entendendo a tradición como un ente flexible que se adapta ao contexto musical actual a través de sons que viaxan dende as percusións ata referencias electrónicas. Unha proposta única no seu discurso tanto musical coma extramusical, liderada por Carme López (voz e percusións), xunto a Camille Hedouin (electrónica e voces) e Sara Méndez (saxofón).

Lidiera, pola súa banda, é un trío formado por Sara Méndez (saxofón soprano), Gabi Reboredo (voz e percusión) e Lois Prado (saxofón tenor e sintetizador). Lideira comezou a súa andaina nunha Foliada Guímara e agora vai amenizando os torreiros con pezas bailables polo país adiante. A partir das músicas de tradición oral, procuran un son persoal a través da mestura de instrumentos de vento, percusións de man, voz e outras fantasías.

Os concertos comezarán ás 21:00 horas na área recreativa de Samugueiros, onde tamén haberá barra e postos de comida, produtos locais e artesanía.

Para ir quecendo motores, ás 18:30h ofrecerase un obradoiro de baile tradicional para todos os niveis a cargo de Gabi Reboredo. É preciso inscribirse previamente por WhatsApp no teléfono 650624828.

Como anticipo ao festival, o venres 26 ás 20:00 horas na Casa da Cultura 'Olga Novo', a etnomusicóloga Xulia Feijoo presentará o seu libro-CD Concha do Canizo. Este pandeiro que toco... no que aborda as prácticas de transmisión oral protagonizadas polo pandeiro na Terra das Frieiras, no suroeste da provincia de Ourense. Concretamente, por unha das grandes escolas de tocadoras do pandeiro en Galicia, a de Concha do Canizo. O fío condutor é a historia de vida da propia Concha construída a partir de entrevistas e gravacións musicais, até o de agora inéditas, que lle foron realizadas nun período de sesenta anos (1952-2012). O libro contén fotografías, bailegramas, transcricións musicais e lingüísticas e información dos usos e costumes na sociedade tradicional de alto valor antropolóxico, histórico, etnográfico e filolóxico.