Please enable JS

ADEGAS DE VILACHÁ

Vilachá é a única parroquia da Pobra do Brollón que linda co río Sil, onde o cultivo da vide ten grande importancia. Pertencendo este territorio á subzona Quiroga Bibei da D.O. Ribeira Sacra. Ademais da ribeira de impresionante beleza da que se pode desfrutar desde o mirador acondicionado na zona, Vilachá destaca polo conxunto etnográfico que conforman as súas centenarias adegas.

Case medio cento de adegas cubertas por tellados de pizarra a dúas augas, construcións que gozan de protección por parte da Xunta e que están catalogadas como de Interese Turístico, consideradas unhas das máis antigas da península.

En Vilachá de Salvadur celébrase cada primeira fin de semana de Maio a tradicional cata dos Viños de Vilachá, onde degustar, nunha contorna de conto, os viños producidos nestas ribeiras.

 

Nos meses de xullo e agosto celebramos Os domingos de Vilachá (máis información e reservas no teléfono 666 435 832)

Domingo 11:00 h. Punto de encontro: Adegas de Vilachá

Duración: depende do viño / Distancia: 2 km.

Trátase dun pequeno roteiro que ten como obxecto aproveitar o espazo inigualable das Adegas de Vilachá. Esta visita ten un carácter máis lúdico, xa que o obxectivo final é a de crear unha xuntanza nas adegas abertas nas que, probando o viño, se favoreza a conversa cos produtores. Comezamos a actividade nas adegas de Vilachá para seguir camiñando ata o Mirador da Capela, un balcón sobre o Sil no que coñeceremos máis sobre a Ribeira Sacra. Rematamos volvendo ás adegas onde os pequenos produtores nos abrirán ás portas para tomar un vaso de viño, petiscar algo conversar, e se cadra ata rematar botando unha cantiga.

As adegas estarán abertas a partir das 13:00  h. E non é necesario vir á andaina para ir tomar uns viños. O obxectivo é que suba quen queira e xerar un ambiente festivo e agradable. 

 

Adegas de Vilachá