A Pobra do Brollón presenta unha nova estratexia turística cunha oferta de cinco tipos de visitas guiadas

A Pobra do Brollón presenta unha nova estratexia turística cunha oferta de cinco tipos de visitas guiadas

28 Xuño 2018/concello/Cultura

Tras do éxito da campaña de visitas guiadas ao Castro de San Lourenzo do verán pasado –12 persoas de media diaria– para este ano, o Concello decide manter as visitas ao castro e ampliar a oferta incluíndo outros elementos de interese do Concello. A oferta pretende ser o máis diversa posible, chegar aos principais puntos de interese e ser atractiva para todos os gustos.

“Esta oferta de visitas responde á clara aposta do Concello por un turismo cultural de calidade” – comenta Xosé Lois Maceda, alcalde da Pobra do Brollón – “A apertura do aloxamento municipal solidario e o feito de potenciar o Camiño de Inverno, todo vai na mesma dirección: temos que crear oferta e que a xente veña e isto repercuta na economía local”. O ciclo de visitas desenvolverase entre xullo e agosto. Para acudir será necesario reservar no teléfono 666 435 832.

A oferta é a seguinte:

Castro de San Lourenzo

De martes a venres ás 11:00 h. (duración 1 hora) Punto de encontro: Ao pé do Castro, no cartel

Trátase dunha visita directamente ao Castro de San Lourenzo, no que se estará realizando a cuarta campaña de escavación. Durante a visita, ademais de poder achegarse ao traballo arqueolóxico e ás últimas novidades, os visitantes farán un percorrido polos 2.000 anos de historia que alberga o lugar.

Cova das Choias

De martes a venres ás 18:00 h. (duración 1hora 30 min. Incluindo desprazamentos) Punto de encontro: Diante do cuartel da Guardia Civil.

Trátase dun dos elementos máis emblemáticos do Concello que conxuga perfectamente, patrimonio natural e cultural. Dende o punto de vista natural interesa a propia formación da cova e, sobre todo, os seus habitantes (as choias, varias especies de morcego e o visgo fosforescente)

A fuxida dun Guerrilleiro

Sábados ás 11:00 h. (duración 2 horas. Distancia 3 Km.) Punto de encontro: Repil

Nesta visita, coa Batalla de Repil como trasfondo faremos un percorrido polas zonas menos coñecidas de Cereixa. Trátase dunha andaina que comeza en Repil para, a través das últimas escavacións arqueolóxicas coñecer esta batalla na que no ano 49 foron abatidos 4 guerrilleiros pola Guardia Civil, continuará o percorrido pola hipotética ruta de fuxida do Segura, supervivinte da batalla, ata Cereixa.

Un paseo polos tempos de María Castaña

Sábados ás 17:00 h.
Punto de encontro: Restaurante O Fogón (duración 2 horas. Distancia 2 Km.)

Ruta pola parroquia de Cereixa coñecendo os seus lugares de interese: Igrexa, as Casas do Ramau e de Alende e o Castro de San Lourenzo onde remata a ruta. Ademais, farase un achegamento aos/ás veciñ@s de Cereixa do presente e do pasado entre os que destaca María Castaña.

Os domingos de Vilachá

Domingo ás 11:00 h.
Punto de encontro: Adegas de Vilachá (Distancia 2 Km.)

Trátase dun pequeno roteiro que ten como obxecto aproveitar o espazo inigualable das Adegas de Vilachá. Esta visita ten un carácter máis lúdico, xa que o obxectivo final é crear unha xuntanza nas adegas abertas nas que, probando o viño, se favoreza a conversa c@s produtor@s.

Irase desde as adegas ata o Mirador da Capela, un balcón sobre o Sil e a viticultura da Ribeira Sacra. As adegas estarán abertas a partir das 13:00 h. Non é necesario vir á andaina para ir tomar uns viños. O obxectivo é que suban quenes o desexen e xerar un ambiente festivo e agradable.



RELACIONADO