Catástrofe humanitaria en Gaza: Declaración do Concello da Pobra do Brollón

Hai máis dun ano que o mundo é testemuña dun grao inconcibible de morte e destrución na Franxa de Gaza ocupada.

O brutal ataque de Israel contra a poboación palestina de Gaza matou a decenas de miles de persoas, a maioría civís, incluídos nenos e nenas.

Israel está a arrasar barrios residenciais, destruír infraestruturas críticas e desprazar forzosamente a 1,9 millóns de palestinos e palestinas —máis do 90% da poboación da Franxa de Gaza—, causando unha catástrofe humanitaria sen precedentes.

Israel ten en marcha innumerables accións encamiñadas a causar un dano irreparable á poboación palestina, dende as operacións militares israelís en Gaza que comezaron tras os terribles ataques de Hamás, constitutivos de crimes de guerra, do 7 de outubro do ano 2023 que ocasionaron a morte de mais de 1250 persoas e a toma de mais de 250 reféns.

Mentres o mundo mira impasible, Israel rompeu unilateralmente o cesamento do fogo e segue cometendo ataques con impunidade que causan a perda incesante de vidas palestinas mentres a desesperada catástrofe humanitaria en Gaza empeora cada vez máis.

Á luz da urxencia da situación, o Concello da Pobra do Brollón súmase ás esixencias de organizacións humanitarias estatais e internacionais, e pide:

• Un cesamento do fogo inmediato para protexer a vida da poboación civil en Gaza.
• Que as autoridades israelís deixen inmediatamente de cometer actos prohibidos na Convención sobre o Xenocidio contra a poboación palestina de Gaza.
• Que as autoridades israelís faciliten con urxencia o acceso humanitario e a entrega de axuda a Gaza, levanten o bloqueo inhumano e ilegal a este territorio e poñan fin á ocupación do Territorio Palestino Ocupado, declarado ilegal pola opinión consultiva da Corte Internacional de Xustiza de xullo de 2024.
• Que Hamás e outros grupos armados en Gaza liberen inmediatamente as persoas civís retidas como reféns, e que Israel libere ás persoas palestinas detidas arbitrariamente.
• Que a Unión Europea utilice o seu poder para garantir o respecto aos Convenios de Xenebra: que todos os Estados suspendan as transferencias de armas ás partes no conflito, cooperen para garantir a rendición de contas por violacións do dereito internacional e apoien ás institucións e mecanismos internacionais, incluídas as investigacións da Corte Penal Internacional e da Comisión de Investigación da ONU sobre o Territorio Palestino Ocupado.
• Que a Unión Europea se opoña fronte a calquera intento de establecer unha presenza militar permanente en Gaza, modificar as súas fronteiras ou deportar á poboación palestina de Gaza ou Cisxordania, e recoñeza que este traslado forzoso é unha grave infracción do Cuarto Convenio de Xenebra e constitúe un crime de guerra.

Imaxe de Jaber Jehad Badwan (https://commons.wikimedia.org/wiki/File:Forced_Displacement_of_Gaza_Strip_Residents_During_the_Gaza-Israel_War_23-25.jpg#/media/File:Forced_Displacement_of_Gaza_Strip_Residents_During_the_Gaza-Israel_War_23-25.jpg)