Charla sobre o plan de compostaxe e presentación dun punto limpo móbil na Pobra do Brollón

composteiros comunitarios na Pobra do Brollón

Charla sobre o plan de compostaxe e presentación dun punto limpo móbil na Pobra do Brollón

Novembro 14/concello/Xeral

Este sábado ás 12:00 terá lugar na Casa da Cultura ‘Olga Novo’ unha charla na que se fará balance do plan de compostaxe do Concello da Pobra do Brollón e recordarase o funcionamento dos composteiros comunitarios. 

Tamén presentarase o novo punto limpo móbil co que se facilitará aos veciños das diferentes parroquias a reciclaxe e o depósito correcto de residuos. No evento participarán o concelleiro de medio ambiente, Ricardo Rodicio, e dous expertos do Plan Revitaliza da Deputación de Pontevedra. 

A compostaxe é a maneira de converter os restos vexetais e de comida en fertilizante natural ou compost. Na Pobra do Brollón existen dende marzo 2018 seis composteiros comunitarios para facilitar a compostaxe dos residuos que xeran os fogares e negocios do concello. Na charla recordarase o seu funcionamento e repartirase entre os veciños asistentes uns sacos de compost resultante.

‘A compostaxe non só implica aforro na recollida do lixo e en fertilizantes; tamén reduce a contaminación e mellora a saúde da terra e das plantas, entre outras vantaxes,’ comenta o concelleiro Ricardo Rodicio. ‘Co noso programa de compostaxe, A Pobra do Brollón é un concello pioneiro na provincia de Lugo, seguindo o exemplo de concellos como Allariz e Pontevedra.’

No evento participan dúas persoas expertas do Plan Revitaliza, un modelo exemplar de compostaxe impulsado dende a Deputación de Pontevedra e que xa está estendido por máis de corenta concellos da provincia. Os asistentes poderán escoitar a Carlos Pérez Losada, asesor do plan, e a Manuel Enrique, un ‘mestre composteiro’, encargado de vixiar que a compostaxe se faga correctamente.

Un Concello que aposta pola reciclaxe

A Pobra do Brollón facilita aos veciños a reciclaxe e o depósito correcto de refugallos con propostas como puntos de recollida de aceite usado, o punto limpo e o servizo de recollida domiciliaria de residuos voluminosos. 

Ademais, na charla do sábado vaise presentar unha nova iniciativa: un punto limpo móbil que circulará polas diferentes parroquias do concello para facilitar o depósito de residuos como lámpadas, pilas,  pinturas, medicamentos caducados ou aceite usado. 

Dende o Concello anímase aos veciños e a calquera persoa interesada a participar, para entre todos colaborar por un concello limpo e respectuoso co medio ambiente. 



RELATED POSTS