A Guimaralia celebra o Nadal cunha ampla oferta de actividades

Actividades de Nadal na Pobra do Brollón

A Guimaralia celebra o Nadal cunha ampla oferta de actividades

Decembro 13/concello/Xeral

O Concello da Pobra do Brollón vén de presentar Nadal na Guimaralia, unha ampla e variada programación de actividades pensadas para todo tipo de público este Nadal. 

Como non podía ser doutro xeito, os máis pequenos teñen especial protagonismo. As mañás dos días 23, 26 e 27 de decembro, ofreceranse actividades para nenos e nenas na Biblioteca Municipal, como contacontos, elaboración de adornos e postais de Nadal, e actividades de lecturas. As persoas interesadas deben inscribirse na Biblioteca antes do día 20. 

O día 28 pola tarde, visitarán a Casa da Cultura Os Bolechas, os personaxes da popular serie infantil. Xa en xaneiro, o día 4 haberá tamén na Casa da Cultura outro evento para público familiar coa ilusionista Fani Triana e o seu espectáculo ‘Igualdade, onde estás?’.

Tradicións e novidades para os adultos

Unha tradición recuperada nos últimos anos que une a nenos e maiores, é a visita do Apalpador. Este personaxe baixará a terras guímaras o día 24 de decembro, acompañado dunha agrupación local de música. Comezará a súa visita ás 12:00 no Centro de Día, e despois percorrerá as rúas da Pobra do Brollón.

Xa pensando especificamente no público adulto, o domingo 29 de decembro acontecerá unha das grandes propostas do programación de Nadal do Concello. Trátase da proxección de O que arde, a afamada película de Oliver Laxe, nomeada a catro premios nos próximos Goya. Haberá dúas pases da película, ás 18:00 e ás 20:00, e a entrada é solidaria: pídese un donativo dun quilo de alimentos que serán destinados a colectivos desfavorecidos do concello. Os interesados xa poden reservar as entradas.

Nas datas chave das festas de Nadal tamén hai eventos programados. Para celebrar o inicio do novo ano celébrase o baile de Fin de Ano coas actuacións dos dúos Eclipse e Explosión, a partir da medianoite na Casa da Cultura. O día 5 de xaneiro celébrase a tradicional Cabalgata de Reis que comezará ás 16:30 no Centro de Día percorrendo as rúas da Pobra do Brollón ata a Casa da Cultura.

O Centro de Día da Pobra tamén quere celebrar o Nadal en comunidade. Concretamente, o día 24 de decembro despois da visita do Apalpador, actuará a cantante do Incio, Lucía Pérez. Será a partir das 12:30, e é un evento aberto ao público. 

Concursos de poesía e postais

Ademais dos eventos, hai en marcha dous concursos temáticos. Un é un certame de poesía e poden participar menores de ata 16 anos con poesías sobre o tema do Nadal. O outro é un concurso de postais de Nadal, no que poden participar persoas de ata 30 anos de idade. Para ambos o prazo para entregar os traballos remata o 20 de decembro.

O fallo do xurado de ambos concursos así como a entrega de premios faranse o día 5 de xaneiro na Casa da Cultura, ao remate da Cabalgata de Reis.



RELATED POSTS